قصة القط الاسود
دش، بقالي من ساعة ما جيت وانا لابس نفس اللبس، خرجت هدومي من الشنطة وحطيتها في الدولاب واخدت اللبس اللي انا هلبسوا ورحت علي الحمام، اول ما حطيت رجلي الشمال جوا الحمام عشان ادخل لقيت اللمبة بتاعت الحمام رعشت رعشة بسيطة ورجعت ثابتة زى ما كانتي، ما انتبهتش للامر لان ممكن تكون اللمبة فيها عيب او قربت تبوظ، المهم قلعت وشغلت الدش وابتديت اتشطف بالصابونة، بس مش عارف ليه حسيت بقبضة في قلبي واني خايف من حاجة! ولاني كنت عادي مش خايف يعني ونسيت اللي حصل، لكن حصل اللي خلاني اخاف بجد، اللمبة رعشت تاني، بس المرة دى مش رعشة واحدة وثبتت لا، المرة دى رعشت شوية وطفت خالص! ، وقفت تشطيف وقفلت الدش وانا ببص للمبة وبقول لنفسي هي حرقت ولا النور قطع! ،
لكن لما بصيت تحت باب الحمام لقيت ضوء النور اللي برة شغال! ، تمام يبقي كده اللمبة هي اللي حرقت، شغلت
الدش لتاني مرة وكملت تشطيف في الضلمة، وابتديت اغني اى حاجة عشان اكسر الخوف بتاع الضلمة اللي انا فيها، لكن حصل اللي خلاني سكت تماما، مع صوتي وصوت الدش اللي كان شغال كان في صوت قطة بتنونو بس مكنتش منتبه للصوت بسبب صوت الدش مع صوتي، لكن بعد شوية انتبهت للصوت،
قفلت الدش عشان اسمع بوضوح، صوت القطة كان كل ما بيروح يعلي ويعلي لحد ومن شدة الصوت سديت وداني بايدي ولقيت اللمبة اللي فوق راسي فرقعت بصوت عالي انا اتخضيت وبسبب الخضة والخوف فقدت الوعي، لما فوقت فتحت عنيا بتأثر الوقعة كنت بفتح عيني بالعافية لكن لما فتحت كويس لقيت نفسي قاعد في مكان مظلم، مكنتش قادر احقق انا فين، سندت بايدي علي الارض عشان اقوم اتصدم ايدي كانت بتحسس علي حاجة شبه التراب او يمكن دا تراب فعلا، قومت بضهري وانا قاعد علي الارض وبرجع لورا لقيت ضهري اتخبط في جدار حيطة وراه، ضربات قلبي بدات تزيد، ظهر قدامي في الضلمة
