روايه المره الثلاثين بقلم دودو محمد

حاجبها بضيق 
هنروح طبعا 
بس 
بس ايه ياجوري!
في حاجه حضرتك 
لفت مي بفزع وصرخه مكتومه 
اما عني ابتسمت ابتسامه واسعه وانا بلف بلهفه 
اوس 
رفع حاجبه باستغراب 
انتي 
مي بتساؤل 
هو ده اوس 
هزيت راسي بفرحه ولهفه وهو واقف بيوزع نظراته ما بينا باستغراب وحيره!
حط أيده في جيب البالطو وهو بيسألني بجديه 
انتي هنا بتعملي ايه في الوقت ده 
فركت ايدي بتوتر وانا ببلع ريقي وبقرب منه خطوه 
انا جايه هنا عشانك 
عشاني انا!!
انا اسفه 
علي ايه !
اسفه علي الكلام اللي قولتهولك ا انا من وقت ما مشيت وانا حاسه بندم وحاولت اوصلك لكن مقدرتش!
مكانش قدامي اي حل غير اني اجي علي هنا يمكن الاقيك 
ضحك بذهول 
انتي مجنونه
مجنونه عشان عايزه اعتذرلك!
هز رأسه بنفي 
لا مش القصد بس انتي عارفه الساعه كام دلوقتي طب بلاش الساعه 
انتي مش شايفه الجو عامل ازاي ! 
اخدت نفس عميق وانا بهز اكتافي بلا مبالاه
مش مهم كل ده المهم اني لاقيتك 
والمهم انك تسامحني علي اللي اتقال 
ابتسم ابتسامه لطيفه 
تصرف مچنون لكن معناه انك لطيفه وطيبه وعموما
حصل خير انا مش زعلان 
بجد
بجد 
مي وهي بتترعش وبتبتسم ابتسامه مهزوزه
طب الحمد لله اننا قدرنا نوصل لحضرتك يا استاذ اوس دي جوري قالبه البيت مناحه والله من الصبح 
اتجاهل كلام مي وبصلي وهو بيسألني بهدوء 
اسمك جوري
مي ببلاهه وهي بتهمسلي
هو مأخدش باله مني ولا ايه هو انا شفافه!
اتنحنح وهو بيمنحنا ابتسامه جميله زي
طب بما انك قطعتي المشوار ده كله عشان تعتذريلي ايه رأيكم اعزمكم علي حاجه سخنه
كان اقتراح جاي في وقته في الحقيقه 
وخاصه ان الجو كان برد بشكل ميتوصفش 
كانت مي هترفض بس أنا ضغطت علي ايديها وهزيت راسي بموافقه بالرغم من أنها مكانتش الساعه المناسبه لقبول عرض زي ده 
فتحلنا باب الكافيه ودخلنا احنا التلاته وقفلناه مره تانيه ورانا 
ابتسم بحماس ومرح
طبعا زي ما حضراتكم شايفين مفيش حد غيرنا فأنا اللي هتولي عمل المشروب الساخن حضرتك تطلبي ايه يافندم 
مي بتفكير 
اممممم هوت شوكلت 
بصلي وهو بيقول بصوت رقيق وهادي 
وحضرتك يافندم
ابتسمت بخجل 
زيها برضو 
غاب شويه وبعدها رجع بصينيه عليها تلت فناجين قهوه!
حطها قدامنا علي التربيزه وهو بيبتسم بأحراج 
سوري بس انا اصلا مش بعرف اعمل غير قهوه 
بصينا لبعض انا ومي واحنا بنضحك علي تعبيرات وشه الطفوليه اللي كانت محببه لقلبي في الحقيقه 
باين كده قلبي مال وهتبقي ليله كبيره اوي وفستان وطرحه وانا اصلا اصلا لسه عيله صغيره!
بدأنا نشرب القهوه وبصراحه كان طعمها يجنن 
يمكن قهوه عاديه زي اي قهوه شربتها 
لكن يمكن طعمها كان لذيذ ومختلف لأنها من أيده 
كان الموقف أشبه بلقطه من فيلم اجنبي في ليالي الشتاء القارصه 
الصمت هو سيد المكان 
الهواء بيخبط في الازاز 
الشتا بينزل مع صوت برق ورعد 
ريحه القهوه الدافيه مع ريحه الشتا ريحه تجنن 
رفع رأسه وهو بيبصلي قاطع الصمت المريب ده 
هو انا ممكن أسألك سؤال 
حطيت الفنجان علي التربيزه وهزيت راسي بموافقه 
اخد نفس عميق وهو بيغمض عيونه وبيسأل بحزن 
هو لو واحد زي اتقدملك ترفضي
في الحقيقه سؤاله فاجئني 
مكنتش اتوقع انه ممكن يسأل سؤال زي ده 
لكن على قد ما هو فاجئني علي قد ما كنت حابه اجاوبه لاني عارفه ومتأكده أن الاجابه بتاعتي هتفرق معاه 
اتنهدت وانا ببتسم وبشبك ايدي الاتنين في بعض وببص في عيونه 
ارفض ليه
عشان انا مظهري العام مش لطيف 
طب ما أنا كمان مظهري مش لطيف!
لا انتي الحړق اللي في وشك مميز 
بمعني!
بمعني أن اللي يشوفه ميقولش أنه حړق 
يقول أنه وحمه مثلا
شكله مميز وجميل فيكي 
ابتسمت وانا برد بهدوء 
كل واحد بيشوفك بعين 
بمعني 
بمعني أن مش كل العيون شيفاك زي بعض 
في عيون شايفه أن اللي فيك ده ميزه وطابع خاص 
وعيون شايفه أنه لا اللي فيك ده عيب وشكله بشع 
يعني انا مثلا عمر ما حد قالي أن الحړق ده شكله مميز غيرك!
لانه فعلا مميز 
طب علي فكره بقي وانت كمان البهاق اللي في وشك مميز 
ابتسم بحزن
شكرا علي المجامله اللطيفه ديه 
رديت بجديه 
بس انا مش بجامل انا بقول الحقيقه 
بص في عيوني لحظه وسكت بعدها رفع أكتافه بتفكير 
طب بما انك شيفاني مميز وانا شايف انك مميزه 
ايه رأيك نتجوز!
نعم نتجوز!
مالك اټخضيتي ووقفتي ليه 
هتمشي وتهربي من سؤالي زي اي حد هرب مني مش كده 
سألني ببرود وهو بيسند ظهره علي الكرسي وبيبص في عيوني بتحدي
اخدت نفس عميق انا بسند ايدي الاتنين علي التربيزه وبميل بنص جسمي وببص في عيونه بتحدي اكبر 
بس مش انا اللي اهرب من المواجهه يا استاذ اوس 
ابتسم ابتسامه بسيطه وهو بيرفع حاجبه 
اذا جاوبيني علي سؤالي
قعدت علي الكرسي مره تانيه ورديت بهدوء 
اجاوبك علي سؤالك 
الرد هيكون لا 
و رفضي ليك مش عشان شكلك نهائيا زي ما جه في بالك دلوقتي !
رفضي لعده اسباب 
السبب الأول اني معرفش عنك حاجه عشان اوافق عليك 
السبب الثاني ان كنت بتقول أن مظهري لطيف ومميز فده شيئ لطيف منك واشكرك عليه انما انت من جواك اكيد متقدرش تعيش مع واحده بشكلي البشع ده 
السبب الثالث أن البهاق اللي
عندك ممكن يروح وترجع طبيعي 
انما انا الحړق اللي في وشي درجه تالته واستحاله يروح وانا استحاله افكر اعمل عمليات عشان اخفيه لاني بخاف من المواضيع دي جدا 
كان قاعد ساند خده علي أيده وبيبصلي وانا بتكلم بنظرات غريبه وابتسامه بسيطه مرسومه علي وشه!
في الحقيقه مكنتش فاهمه التعبيرات الغريبه ديه سببها ايه 
طب ليه بيضحك 
هو انا بقول نكت!!
لو بقول نكت عرفني طيب يمكن اضحك معاك 
هو انا ممكن افهم انت بتضحك علي ايه !
عليكي 
والله ليه اراجوز
هز رأسه وابتسامته اختفت وهو بيرد بجديه 
لا مش اراجوز بس أسبابك مش منطقيه 
رفعت حاجبي ورديت بضيق 
اقدر افهم ليه 
لاني بتقدملك زي اي عريس صالونات عشان كده اول سبب مش مقبول بالنسبالي
تاني سبب انا شخص مش بيعرف يجامل من الأساس 
ولما قولتلك أن شكلك مميز فده مش لطف مني لا ده حقيقه انا مقتنع بيها مليون في الميه 
ثالث سبب بقي البهاق اللي عندي مش هيروح هفضل عايش بيه طول عمري وحتي لو حصلت معجزه واختفي انا اكيد مش سطحي اوي للدرجادي عشان اسيبك وقتها 
لو كنت بحبك استحاله اسيبك عشان شكلك أو وزنك أو أي صفه فيكي انتي مش متقبلاها ولا حتي المجتمع بنظراته المريضه قادر يتقبلها 
انا قبلتك من البدايه بوضعك واستحاله اطلب منك تغيريه في يوم عشاني!
ف ايه المانع انك تجربي 
مش يمكن يبقي لينا نصيب في بعض 
سكتت لحظه اول ما خلص كلامه 
كانت لحظه صمت رهيبه عمري ما اتعودت عليها وقت النقاش مع اي بني آدم أيا كان
طول عمري بنهي اي نقاش أو اي جدل كسبانه في النهايه وقادره اقنع اللي قدامي يغير من وجهه نظره 
لكن المره ديه!
الوضع مختلف تماما 
جه الشخص اللي قدر يخليني مهزومه وبسأل نفسي الف سؤال في الثانيه الواحده 
جه الشخص اللي من مجرد كلمتين قدر يقنعني ويخليني ارفع رايه الاستسلام بكل نفس هاديه
ها يا جوري قولتي ايه 
اخدت نفس عميق وانا بهز راسي بثبات وبطلع ورقه وقلم من شنطتي وبكتبله رقم بابا 
كلم بابا وحدد معاه معاد يلا يا مي 
قام وقف بسرعه 
لا يلا ايه 
مي باستغراب 
هو ايه اللي ايه هنمشي !
عارف بس اكيد مش هسيبكم لوحدكم 
بمعني
شاورلنا بهدوء 
اتفضلوا هوصلكم 
بس 
قاطعني بإصرار 
انسي اني اسيبكم تروحوا في الوقت ده لوحدكم يا انسه جوري لو سمحتي اتفضلوا 
هزيت راسي باستسلام وخرجنا من الكافيه وطلبنا اوبر ووصلنا البيت في وقت قصير لكنه مر عليا وكأنه سنه وخاصه وانا شايفه نظراته ليا في المرايه اللي اتعمد يسلطها عليا ابن ال احم ابن الحلوه 
حمد الله علي السلامه 
بصيت يمين وشمال بتوتر وانا بفرك في ايدي 
الله يسلمك شكرا 
ا احم ممكن رقمك 
هه 
رقمك عايز رقمك 
كشرت ورديت بضيق 
لا مش ممكن لما تيجي تتكلم مع اهلي تبقي تاخد رقمي عن اذنك 
قولت كلامي ومشيت من قدامه من غير ما اسمع رده حتي 
اول ما دخلت من باب العماره فضولي خلاني الف وشي لقيته لسه واقف في مكانه وبيبتسم بهدوء 
اتوترت وقلبي دق ولفيت وشي بسرعه وانا بقول لمي بتوتر 
هو بيضحك عليا ليه الواد ده هو انا بقول نكت!
ردت بذهول مصطنع 
لا والله وانتي مش عايزاه يضحك 
حطيت ايدي في وسطي ورفعت حاجبي 
والله ويضحك ليه بقي أن شاء الله 
عشان انتي عبيطه ياحبيبتي 
يعني واحده نزلت في نص الليل عشان تعتذر لواحد وقبلت عرضه انها تشرب قهوه عنده في الكافيه وقعدت تتكلم معاه وفي الآخر رفضت تديله رقمها!!!
يعني ده شئ منطقي 
اه منطقي انا روحتله عشان اعتذرله مش عشان يشقطني
ضړبت كف فوق التاني بذهول 
لا حول ولا قوه الا بالله 
انتي تعبانه في نفوخك يابنتي 
ما الراجل هيتقدملك 
ولو ولووووووو 
ربنا يعينك علي المهلبيه اللي في دماغك 
انا كان ايه اللي خلاني ابات معاها بس النهارده ياربي 
ابتسمت ابتسامه واسعه 
قدرك ونصيبك بقي 
مي انا خاېفه 
قولتها لمي واحنا قاعدين في اوضتي بعد ما وصلنا البيت واتسحبنا عشان محدش يحس بينا
شربت اخر بوق من الفنجان اللي في ايديها
من ايه ياحبيبتي 
بصيت قدامي وانا بتنهد بحيره 
خاېفه اوافق 
ليه ياجوري أنا شايفه أنه شخص لطيف جدا ومحترم 
معرفش خاېفه 
عايزه سبب لخۏفك الغير مبرر ده!
شكلي 
نفخت بضيق وهي بتبصلي بعتاب 
تاني يا جوري 
هزيت راسي بتأكييد وعيوني بتلمع بالدموع 
تاني وتالت وعاشر يامي 
انا هفضل طول حياتي عندي عقده من شكلي
بس هو اللي طلب منك الجواز 
وقالك أنه متقبل شكلك!
اتنهدت بحزن وسندت ظهري علي السرير بصمت 
كان جوايا الف سؤال وسؤال مفيش اجابه ليهم في الحقيقه 
كان عندي فضول اعرف هو فعلا متقبل شكلي ولا ديه مجامله ولا بيقرب مني عشان مصلحته زي ما حصل زمان!
جوري مش كل الناس زي طارق 
بصيت لمي والدموع متجمعه في عيوني وفجأه اترميت في حضنها واڼفجرت في العياط 
شئ جميل أن يبقي معاك حد يفهمك من غير ما تتكلم 
سواء اخ صديق حبيب أهل 
يفهم صمتك ده معناه ايه
يفهمك من نبره صوتك 
نظره عيونك 
تصرفاتك 
كلنا بنبقي محتاجين الشخص ده في حياتنا 
كلنا بيبقي جوانا صراعات داخليه مبتنتهيش ومش قادرين نعبر عنها لحد لأسباب كتير منها الكبرياء!
جوري عشان خاطري متعيطيش 
طارق ميستاهلش دموعك 
هو مجرد شخص قذر دخل حياتك وخطبك عشان مصلحته 
هو عمره ما حبك 
كان عايز يعمل شو بيكي وياخد الترند
ده شخص ميستاهلش تفكري فيه من اساسه 
مش كل الناس زيه 
مش كل الناس بتقرب منك عشان مصلحه 
في ناس فعلا مشاعرها حقيقيه 
رفعت راسي وانا بسألها پخوف 
تفتكري
ابتسمت وهي بتهز رأسها 
جدا 
اخدت نفس عميق ورفعت راسي للسقف 
يارب عوضني خير 
يارب أن شاء الله 
يلا تصبحي علي خير 
باستني من خدي بحب
وانتي الخير ياعيوني 
تاني يوم الصبح صحيت بدري ونزلت انا ومي الكليه 
بقولك ايه انا جعانه 
ردت مي وهي بتحط ايديها علي بطنها 
وانا كمان اوي 
بصيتلها بنظره خبيثه 
ايه رأيك نفكس المحاضره
هزت راسها بنفي وإصرار 
مستحييييل احنا كل مره نفكس لآخر محاضره ديه ونروح انا معرفش شكل الدكتور لحد دلوقتي
رديت بلا مبالاه 
ياختي اتنيلي يعني هنشوف توم كروز!
كده كده هنطلع بملاحق 
بجد مش عارفه من غير التفاؤل بتاعك ده كنت عملت ايه 
عدلت ياقه القميص اللي مكانتش موجوده من اساسه ورديت بغرور مصطنع 
يلا