بقلم ريهام الفقي

_خديجة.. ديجا حبيبتي إنت فين
_أنا في المطبخ يا حمزة ثواني وجايه يا حبيبي.
غسلت إيدي وخرجت أشوف حمزة واستقبله زي كل يوم بابتسامة جميلة حتى لو تعبانة هو مش جاي من دريم بارك عشان اكشر في وشه!
الراجل جاي من شغل وتعب ومواصلات وفرهدة يستحق إبتسامة لطيفة حنين أكلة حلوة حاجة تهون عليه تعب يومه لكن يبقى أنا وضغط الشغل عليه هل ده ينفع أكيد لأ بل ده هيأثر على علاقتنا وهطلع ست نكدية في الآخر ووقتها هيكون من حقه يتجوز اه والله أصل أنا موفرتش ليه السكن والدفيء اللي محتاجه هيدور عليهم برا صح كده.
_حمدا لله على سلامتك يا حبيبي.

_الله يسلمك يا عيوني أخيرا خلصت شغل وطلبت الإسبوع الأجازة اللي اتفقنا عليه وخدت الموافقة.
_بجد يا حمزة
_بجد يا عيون حمزة.
_أنا مبسوطة أوي.
_ربنا يقدرني وأسعدك دايما هدخل أغير واتوضى وأصلي على ما تجهزي الأكل إنت صليتي صحيح
_اه يا حبيبي الحمد لله.
_تقبل الله يا سكرتي.
_منا ومنكم يا عيوني.
_حرما يا ميزو.
_جمعا يا حبيبي.
_يلا عشان نتغدى عملالك صنية بطاطس بالفراخ إنما إيه هتاكل صوابعك وراها.
قام من على سجادة الصلاة وشالها ومسك إيدي وباسها وهو بيقول
_تسلم إيدك يا ديجا إنت دايما أكلك جميل يشبهلك.
نسيت أقولكم إن أكتر حاجة بحبها في حمزة حنيته وإنه بيعبر عن مشاعره وبيظهرها ليا وحاجة قمة العسل بجد.
_تؤ تشبه قلبك يلا قبل ما الأكل يبرد.
_فكريني كده كنت دايما بقولك إيه بعد كتب الكتاب
ضحكت وأنا برد عليه
_مفسدة اللحظات السعيدة.
_اسم الله على حبيبة عيني لسه زي ما هي.
_بس بتحبني تنكر
_بموت فيك مش بحبك بس.
_مي تو يا سكر.
_الله يرحم التعليم المجاني.
_يبني أنا كل دراستي انجلش بس مبحبش أبين مواهبي بس.
_طبعا طبعا الأكل تحفه بجد تسلم إيدك.
_بألف هنا على قلبك هشيل الأطباق وهعمل كوبايتين شاي بالنعناع.
_يلا هنشيل سوا وأنا هغسل المواعين على ما إنت تعملي الشاي.
_متتعبش نفسك يا حبيبي أنا هغسلهم على ما الشاي يغلي.
_تعبك راحة يا ست وبعدين أنا الإسبوع ده كله ليك هنعمل كل حاجة سوا بصي هخليك تزهقي مني.
_لو فضلت قاعد معايا العمر كله مش هزهق منك وهو أنا أطول إنك تشاركني كل حاجة! ده يوم الهنا والله.
_نور عيني وهنعمل صور الأص اللي ماليه موبايلك دي كلها ويت عليا بس هدلعك.
_وه! شوفتهم إمتى
_أنا حافظ كل تفاصيلك وكل حاجة بتحبيها وبتعمليها عيب تسأليني سؤال زي ده. 
_طيب يا جماعة أنا بطلب الاستعانة بصديق للرد على هذا الكلام الجميييييل.
رد عليا وهو بيضحك
_لا مش للدرجة يا ديجا ويلا عشان نلحق نخلص قبل العصر عاملك مفاجأة.
_هو لسه في مفاجأة كمان ده إيه اليوم الجميل ده.
_اصبري عليا بس قلت هدلعك مصدقتنيش.
_لا دلوقت صدقت فعلا.
_عشان تعرفي بس قد إيه أنا زوج صالح.
_تواضعك يا حمزة مش كده.
_بيقولوا فيا شعر عن تواضعي ده