قصة ( أستدعاء القرين )

رحت الشغل مش عارف ليه ! اول ما دخلت الشغل وكل زملأئي في الشغل بيبصولي بصة غريبة وكأنى لسه موظف جديد في الشركة ، رحت قعدت مكاني في الشغل كان في واحد زميلي قاعد جمبي وده زى ما تقولوا كده صحبي الانتيم ، سلمت عليه عادى زى كل يوم ، اتفجأت لما لقيته بيقولي "انت لسه جديد معانا هنا !؟ وفين عمر هو مشي من الشركة !؟ ، عمر دا انا ، كنت سامع اللي قاله وانا في اندهاش ، كنت مفكروا بيهزر ، قولتله بتهزر صح !؟

لقيته بيقولي وهأهزر معاك ليه انا بسألك عادى ، قولتله مانا مستغرب بصراحة إنك بتسأل علي اسمي وانت عارفه ، قالي وهأعرفه منين !! قولتله ماهو انا عمر ، لقيته بيضحك ويقول وهو حضرتك إسمك عمر برضه ، فجأة لقيت زميل تاني دخل وبصلي وقال " اي ده هو عمر مجاش ولا إيه؟ ، مكنتش حاسس بنفسي ولا حاسس باللي حاوليا من اللي سمعته ، سبت الشغل ومشيت ..

روحت عالبيت وانا برن علي صحبي بتاع العفارېت ده لكن مكانش بيرد عليا كان قافل تليفونه ، لما روحت البيت ووصلت لباب الشقة بتعتي وطلعت المفتاح عشان افتح الباب وفجأة وانا بفتح الباب لقيت واحد من سكان العمارة
بيقولي " انت مين !؟ وبتفتح شقة الاستاذ عمر ليه!؟
- حضرتك انا الاستاذ عمر !

رد عليا وقال : " انت الاستاذ عمر ازاى يعني !؟هتعميني ولا إيه !! ، قولتله " حضرتك والله انا عمر وانت الراجل المحترم، بصراحة كنت ناسي اسمه بس هو كان عارفني ، فجأة لقيته مسك فيا وقال انت حړامي وكنت جاى تسرق الاستاذ عمر ، ولقيته بيقول بصوت عالي في العمارة " حراااامي .. حړامي عايز يسرق شقة الاستاذ عمر ، الناس اتلمت وكل اللي كان جاى كان بيضرب ، فجأة لقيت واحد بيقول الاستاذ عمر جاى اهو علي السلم ، انا قومت عشان اشوفه لقيته انا ايوه دا انا فعلاً طب ازاى ..
الناس قالتله ان ده حړامي عليا كان عايز يسرقك ، لقيته بصلي وأبتسم ابتسامة مخيفة وكأنوا فاهم اللي بيحصلي