نصيبي و قسمتي بقلم ايمان صلاح

عمتو اسيبها قاعده لوحدها يعني 
_ لا يا اختي حنينه يلا خدي الحاجات دي وطلعيها انا خلصت المواعين و المطبخ بعد الغداء اهو طلعي العصير وبعد ما نخلص هاتي الكوبيات واغسليها كويس قدامي 
_ حاضر يا احلى ماما 
خدت العصير وطلعت كان بابا قاعد مع عمتو و محمود قدمت العصير وقعدت معاهم عمتو ميلت عليا وهمست
_ فكرتها كسرتلك حاجه 
بصتلها بعدم فهم _ ازاي يعني كسرت ايه 
ضحكت _ ايد ولا رجل 
ضحكت _ لا جت سليمه المره دي قعدنا شوية وبعدها بابا طلب مني الشاي دخلت عملته وطلعت عمتو بصتلي وغمزتلي
_روحي يا وعد ودي الشاي ل محمود في البلكونه 
_ حاضر يا عمتو 
ماما بصتلي بتحذير_ خليكي يا وعد وهو يجي ياخده 
_ يا ماما بيتكلم في الموبيل انا هوديله الشاي 
خدت الشاي وروحت البلكونه لقيته خلص مكالمه اتنحنحت فبصلي بتوتر 
_ وعد 
_ ايه فيه حاجه اتفضل الشاي 
ابتسم _ شكرا يا وعد تسلم ايدك
ابتسمت _ الله يسلمك اي خدمه جبتلك الشاي لحد عندك اهو 
ضحك _ انتي هتذليني ولا إيه 
_ لا بس عد الجمايل
_ جمايل ايه دي مكنتش كوباية شاي يا معفنه !
_ بس احلى كوباية شاي شربتها متنكرش 
ضحك _ خلاص يا ستي عرفنا انك عملتي شاي وانا شكرتك وقولتلك تسلم ايدك 
_ لا مش كفاية على فكره 
تنح _ امال انتي عايزه ايه تاني 
_ بص بصراحه كده في مشوار عايزه اروحه ومحتاجاك معايا 
_ فيه بنات انا جاي معاكي على طول 
_ بنات ايه يا قليل الادب انت 
بصلي پصدمه مصتنعه_ انا قليل الادب خلاص شوفي مين هيوديكي 
_ لا بالله عليك خلاص انا عايزه اروح مول النهارده فيه حاجات محتاجها وبابا مش هيوافق اروح لوحدي 
_ لا خلاص مش انا قليل الادب 
_ يا عم مكنتش كلمه يلا روح معايا 
_ لا 
_ انت فاكرني هتحايل عليك انا هروح لوحدي 
مط شفايفه_ روحي لوحدك 
_ ماشي يا بشمهندس ماشي
طلعت بره وقعدت جنب عمتو شوية وبعدها قومت لبست وطلعت 
_ انا رايحه المول يا بابا 
_ مش قولتلك متروحيش لوحدك 
_يا بابا هعدي على صاحبتي وهاخدها معايا 
عمتو اتكلمت_ لا صاحبتك لا خلي محمود يروح معاكي 
_ لا يا عمتو انا هروح مع صاحبتي مش عايزه محمود اتعبه معايا 
نادت على محمود وطلع 
_ يلا يا محمود متخليش وعد تمشي لوحدها 
بصلي بضيق_ انا عندي مقابله مع اصحابي يا ماما النهارده اجازتي 
_ خلاص يا عمتو قولتلك هروح مع صاحبتي
_ معلش روح وديها وبعدها تعالى ل اصحابك
_ طيب يلا قدامي يا ست هانم 
اتكلمت بضيق_ وانا قولتلك لا هروح مع صاحبتي مش مهم 
سيبته ونزلت مش بحب امشي مع حد ڠصب عنه يا يمشي معايا وهو حابب ده يا لا 
_ يا بنتي انتي مركبه في رجلك عجل ولا ايه 
_ ايه عايز ايه 
_ مش قولت هاجي معاكي 
_وانا قولت هروح مع صاحبتي
_ متنشفيش دماغك قولت هاجي معاكي خلاص 
_ وانا مش عايزاك تيجي معايا 
_ ليه بقى عشان قولتلك لا 
_ لا عشان مش بحب امشي مع حد ڠصب عنه 
ابتسم _ ومين قالك اني ماشي ڠصب عني 
_ عشان كنت متضايق فوق 
_ انا مش متضايق عشان كده 
_ امال كنت متضايق ليه 
_ عشان روحتي قولتي ل عمتك مش اي حاجه تحصل بينا تقوليلها 
بصتله بذهول _ انا مقولتلهاش حاجه 
_ امال هي قالتلي اروح معاكي ليه مع اني كده كده كنت هاجي معاكي بس بحب اهزر معاكي 
_ انا قولت قدامها وانا بكلم بابا اني هروح مع صاحبتي مش معاك وهي قالتلي روحي مع محمود هيخلي باله