قصه كامله بقلم عمرو راشد

الحقيني يا ماما انا مش عارف اعمل حاجة خالص
مش عارف تعمل حاجة ازاي.. دا النهاردة دخلتك يخربيتك
انا هتفضح يا ماما.. شكلي هيبقا وحش قدام عروستي
حاول تعمل مشكلة يا حازم.. او اقولك اضړبها
كل دا انا كنت سامعاه وانا واقفة ورا الباب.. بس هو الموضوع مبدأش كدا.. الموضوع بدأ تحديدا من عند اهلي
في ايه يا ماما.. بتنادي عليا ليه

انا عايزة اعرف يا بت انتي ايه حكايتك.. مش عايزة تتجوزي ليه عندك 25 سنة ولسة مش متجوزة.. دا اللي قدك متجوز ومخلف تلاتة
ايه الإنجاز يعني يا ماما اني اتجوز واخلف تلاتة
الانجاز يا حبيبتي انك يبقا ليكي بيت و راجل وعيال تربيهم
دا مش اسمه انجاز.. انا كدا هبقا مفرقش حاجة عن الحيوان.. انا لسة شايفة نفسي معنديش القدرة أو المسؤولية اني ابقا ام او زوجة
وهتشوفي نفسك قادرة امتا لما تعدي التلاتين
وفيها ايه لما اعدي التلاتين طالما في الاخر ممكن الاقي شخص كويس اعرف اكمل معاه باقي حياتي
وانتي بقا عايزة تقعدي معايا لحد ما تعدي التلاتين.. لا يا حبيبتي مش هيحصل
انتي عايزاني اتجوز دلوقتي عشان تفرحي بيا ولا عشان خاېفة من كلام الناس
كلام الناس ولا يفرقلي ف حاجة.. انا عايزاكي تتجوزي عشان تشوفي مستقبلك
مستقبلي هو شغلي
مستقبلك هو بيتك وجوزك
كل مرة بنقف عند النقطة دي يا ماما.. عشان كدا عمرنا ما هنتفق
عموما يا حبيبة امك انا اصلا كنت بنادي عليكي عشان اقولك ان في عريس هيتقدملك
مين دا
حازم ابن طنط سحر
الله اكبر على اختياراتك يا ست الكل.. حقيقي انا بنبهر كل مرة نقيتي اكتر واحد انا مش بطيقه وعايزاني اتجوزه
عيبه ايه حازم ابن طنط سحر
انه ابن طنط سحر
دا ازاي دا يعني
يا ماما حازم دا ميعرفش يدخل الحمام من غير ما يقول ل امه
الولد بار ب امه.. عايز يريحها مش زيك
وهو عشان بيراضي امه يطلع عين امي انا
بت أنتي اتكلمي ب احترام.. انا حددت معاهم معاد النهاردة الساعة 9
النهاردة!!!!!
الساعة 9
بصيت في الساعة لقيتها 3 العصر الحمدلله لسة 6 ساعات يدوبك انام شوية قبل ما ييجو.. طبعا كنتو فاكرين اني هنزل اجري على الكوافير لا طبعا.. خليه يشوف على الطبيعة عشان منخدعش حد.. ويإما انا او انت يا ابن طنط سحر الساعة دقت 9 ولقينا جرس الشقة بيرن.. ماما فتحت الباب و رحبت بيهم و دخلو يقعدو.. كنت انا واقفة ورا ستارة المطبخ بتفرج عليهم بعدها ماما قامت وجات المطبخ و اتكلمت بصوت واطي
انتي واقفة هنا بتعملي ايه
ايه يا ماما بتفرج
بتتفرجي على ايه يا بنت
عيب عيب يا ماما كدا طنط سحر تسمعك
طب هاتي العصير وتعالي ورايا وبسرعة
وفعلا طلعت ورا ماما وانا باصة في الارض بخجل.. وانا ولا في خجل ولا في زفت انا بس عشان ماما متضايقش.. حطيت الصنية قدامهم
اهلا يا طنط عاملة ايه
طبعا لقيتها قامت وحضنتني حضڼ شديد جدا لكن المشكلة مش هنا.. المشكلة هي ايدها اللي كانت بتتحط في أماكن غريبة لدرجة خليتني اشك في طنط.. بعدها خرجت من حضنها الحمدلله
زي القمر يا حبيبتي ما شاء الله عليكي
على فكرة يا طنط هما بيحاربو التحرش دلوقتي
ايه!!
ماما شدتني وقعدت جنبها وبدأت تتكلم عني وعن انجازاتي
ريهام بنتي بقا شاطرة جدا في الطبخ.. تصدقي كمان بتعرف تعمل المحشي والصباع بيكون صغير كدا يدوب في بوقك
خلاص يا ست الكل متجوعناش بقا
وسط كل دا انا كنت بتابع العريس.. قاعد ساكت باصص في الأرض مبيعملش اي تفاعل معانا نهائي.. لحد ما ماما قالت
اتفضلو اشربو العصير
طنط سحر مدت ايدها خدت الكوباية وحازم عمل زيها
ايه يا ولد دا هتشرب من غير ما تستأذن مامي
سوري مامي
يا روحي عليك.. اشرب يا زمزومي اشرب يا روح قلب امك بالهنا والشفا
شديت ماما وقربت منها
ماما انا لحد دلوقتي و ساكتة
اخرسي خالص لحد ما يمشو
مكنش دا اول موقف يحصل وبعد 5 دقايق حصل موقف تاني
بعد اذنك يا سهير.. حازم عايز يدخل الحمام
اه طبعا مفيش اي مشكلة.. قوم يا حبيبي
حازم قام وانا قومت قدامه عشان اعرفه الطريق.. دخل الحمام وانا رجعت قعدت جنب ماما وبعد شوية رجع حازم وقعد جنب امه
غسلت ايدك كويس
اه يا مامي متقلقيش
عقمتها
ايوا يا مامي
برافو حبيب مامي
قربت من امي وقولت
ماما انا ساكتة لحد دلوقتي
قولتلك اقفلي بوقك لحد ما يمشو
والحمدلله اليوم خلص ومشيو.. قبل ما ييجو كنت مش موافقة عليه بنسبة 20 وبعد ما شوفتهم بقيت مش موافقة بنسبة 200
ومش موافقة ليه بقا ان شاء الله
جرا ايه يا ماما.. انتي مش شايفة الواد عامل ازاي
عامل ازاي
عيل طري و ابن امه
مالو ابن امه يعني مش بني آدم زينا
يا ماما افهمي حازم دا مينفعنيش.. ولا ينفع اي واحدة أصلا
دا عريس زي الفل مفيش فيه غلطة و امه ست كويسة وهتعاملك زي بنتها
وبالنسبة ل بيت العيلة اللي انا هعيش فيه دا
مش احسن ما تروحي تسكني في منطقة لوحدك متعرفيش فيها حد.. على الاقل امه هتبقا في الشقة اللي تحتك عشان لو حصل أي حاجة
وانا مش موافقة
انتي معندكيش اختيارات يا ريهام عشان توافقي او ترفضي
يعني ايه
انا امك وشايفة مصلحتك أكتر منك
مصلحتي انا عارفاها كويس ولو أنتي فعلا شايفة ان مصلحتي في جوازي من الشخص دا يبقا انتي بتفكري غلط
انتي قليلة الادب وعايزة تتربي.. مش معنى ان ابوكي ماټ وسابنا يعني انا مش هعرف اربيكي.. .كلامي هو اللي هيمشي يا ريهام
للاسف ساعات الاهل بيكونو أخطر علينا من اعدائنا.. ناس كتير جالها تروما من اهلها سواء وهما صغيرين او حتى لو كبار وشكلي انا هكون واحدة منهم.. اتخطبنا انا و حازم و بعد شهرين كنا بنحضر للجواز نسيت اقولكو ان حازم أكبر مني ب 15 سنة يعني عنده 40 سنة ومن غير جواز وطبعا مش محتاجة اقول السبب
بعد مرور 3 شهور
اتجوزنا بعد خلافات وعيوب كتير جدا.. حرفيا انا مشوفتش فيه ميزة واحدة بس تخليني اعرف اكمل معاه ولكن كنت مكملة بسبب كلمة امي
معلش بكرا بعد الجواز يتغير 
جملة كانت سبب في طلاق نص بنات مصر لانهم مبيتغيروش بعد الجواز.. اللي فيه طبع عمره ما بيتغير.. دخلت شقتي وهو كان ماشي ورايا.. نوعا ما كنت مبسوطة
الف مبروك يا حبيبتي مش مصدق انك اخيرا بقيتي معايا في بيت واحد
لفيت وشي و اتنهدت
الله يبارك يا حازم
قولتها ب ابتسامة مصطنعة بعدها هو شدني من ايدي و دخلنا الأوضة.. قعدنا على السرير ومسك ايدي
أوعدك اني هحافظ عليكي وهشيلك في عنيا ومش هخليكي محتاجة اي حاجة
وانا مش عايزة أكتر من كدا يا حازم
طيب انا هسيبك بقا عشان تغيري هدومك
خرج من الاوضة بعد ما اخد هدومه من الدولاب وانا قلعت الفستان ولبست